Të rinjtë e Tiranës, përdoruesit më të mëdhenj të drogës

[Ditta]

Të rinjtë e Tiranës, si dhe të qyteteve me të mëdha në Shqipëri,
konsiderohen si grupet më të mëdha të përdorimit të drogës.
Alban Ylli, drejtori i Shëndetit Publik, thotë se rreth 6-7% e të rinjve,
përdorin drogë duke filluar nga më të lehtat, si tymosja e hashashit, e deri te
kokaina, heroina, me injeksione. Por përveç të rinjve, në grupet e riskut futen
dhe ata që kanë sëmundje seksualisht të transmetueshme si HIV/AIDS.
"7-9 për qind e të rinjve të shkollave të mesme janë ekspozuar ndaj drogave
në mjediset shkollore ose rreth tyre. Pra, u është ofruar përdorimi i një droge
pranë mjedisit të shkollës, çka do të thotë qe trafikantët e drogës,
funksionojnë tashmë kudo, edhe pranë shkollave", tha Ylli.
Sa i përket grupmoshave, ato janë nga më të ndryshme, duke përfshirë këtu dhe
moshat e mesme, por ndërkohë nuk mund të përjashtohen edhe të moshuarit, thotë
drejtori i ISHP-së.